Mat 7 | DOB | STEP | Geya'abo tomota wa'awa'awa to'umaliyedi 'abona nai Yaubada wate 'i'awa to'umaliyemi.

Matthew 7

'Awa to'umali

(Luke 6:37-38, 41-42)

1 Geya'abo tomota wa'awa'awa to'umaliyedi 'abona nai Yaubada wate 'i'awa to'umaliyemi. 2 Manuna to yage 'ediyega tomota wa'awa to'umaliyedi 'iabe 'ediyega Yaubada 'i'awa to'umaliyemi, ta wate mwa'adega wabubuna'esa tomota 'ediya Yaubada nadigega 'ida bubuna 'emiya.

3 Ta nigeya 'ilobwelobweneyo be tasiyo manuna 'uona 'aene matanaya kaiwe senasenamina 'imiyami, manuna 'oyo wate matamuya kegabugabu 'imiyami, ta nigeya 'u'ita'ita. 4 'Enega geya'abo tasiyo 'ueonai 'aene kaiwe senasenamina matanega 'uda 'ewayaule, manuna 'oyo wate matamuya kegabugabu 'imiyami. 5 Ona'ai'aila 'oyo 'ebweu tokabo, aga? Ta esi kegabugabu matamuyega 'uda gimi'ewa yaule, be 'enega 'udune 'ai'aila ta muliyega tasimuna matanega kaiwe senasenamina 'u'ewayaule.

6 Geya'abo Yaubada 'ina yageyao 'u'ebwa'ebwaya kedewa 'ediya, 'abona nai siguitoyasedi ta sigo'iyo. Nigeya sawesawenaya be wate 'imi bagi bawe wa'ebwa'ebwa'edi 'abona nai siabaibailidi.v1 Lo 2:1; Ye 4:11-12

Sidasida manuna

(Luke 11:9-13)

7 Wada sidasida, be Yaubada 'ida 'ebwa'emi. Wate wada 'ebesa be 'enega wada loba. Ta wada 'aukeke be 'enega 'ali 'ida gigege. 8 Ona'ai'aila 'eguma tasisida, Yaubada 'i'ebwaya 'edaya, be 'eguma ta'ebesa ma'etamo taloloba, ta wate 'eguma ta'aukeke 'enega 'ali 'ida gigege manuda.

9 Ta mwa'adega 'omi gogama tamadiyao, 'eguma natumiyao masula manuna sisisida, gulewa wa'ebwa'edi? 10 Nai 'abo iyana manuna sisisida mwata wa'ebwa'edi? Nigeya sa'i! 11 Ona'ai'aila 'omi toto'umalimi, ta 'imi 'ebwaya natumiyao 'ediya ni'atu wamwalamwalatoni, 'aene yage bobo'adimo wa'ebwa'ebwa'edi. Nadigega wate Tamami galewaya, 'abo wasisida 'enaya, 'imwalatonina to'ase bobo'ana 'ilobwenemi be 'ida 'ebwa'emi.

12 Ta 'abo to'ase nuwanuwami be tomota 'emiya siguinuwei 'omi wate nadigega 'ediya wada guinuwa'esa, manuna getei Mosese be palopitao 'idi loina 'ana bwagila.v7 Mk 11:24; Yo 14:13-14v8 Ye 1:5; 1 Yn 5:14-15v11 Ye 1:17v12 Lu 6:31; Lo 13:8-10

'Awa gidalina

(Luke 13:24)

13 'Awa gidalina 'enega walulugu ta geya'abo 'awa sinabwana 'enega, nate 'ebe esilae 'ana 'eda. 'Eda nina sinabwana ga 'ana tauya kapekapeyana, ta 'enega tomota yaudi 'ena sitautauya. 14 Ta yawasi bobo'ana 'ana 'eda 'ana tauya mwauna ta 'ana 'awa gidalina tuga, 'enega tomota pu'epu'edimo silugu.v14 Yo 10:9; Gu 14:22

Kaiwe ta uwana

(Luke 6:43-44)

15 Tosimana kabokabodi 'ediyega wa'ita'i'isimi. Manuna 'aidi ma'etamo 'emiya simamai, 'adi 'ita 'atuwa sipi panapanaisidi, ta soladiya esiya 'atuwa kedewa bosasa. 16 Ta 'idi guinuwao 'ediyega ma'etamo wamwalatonidi, manuna kwakwakwala nigeya sawesawenaya be uwana 'iesibweya. ^{▼▼*sibweya: Me Yudia 'idi kaiwe uwana 'ana esana oine (grape), 'ana 'ita nadigega sibweya uwana.} Buyubuyuwa wate nadigega nigeya sawesawenaya be uwana 'iedamaya. ^{▼▼*damaya: Me Yudia 'idikaiwe uwana 'ana esana pigi (fig), 'ana 'ita damaya uwana nadigega.} 17 Manuna kaiwe bobo'adi uwadi bobo'ana, ta kaiwe to'umalidi uwadi wate to'umalidi. 18 Ona'ai'aila, kaiwe bobo'adi nigeya sawesawediya be uwadi to'umalina siuwaedi. Kaiwe to'umalidi wate nadigega nigeya sawesawediya be uwadi bobo'ana siuwaedi. 19 'Enega 'abo kaiwe nigeya sida uwa bobo'ana tatala yauledi be tagabudi. 20 Nadigega wate tosimana kabokabodi 'idi guinuwa 'ediyega sawesawenaya wamwalatonidi.v15 Gu 20:29; 2 Pi 2:1v16 Ye 3:12v19 Yo 15:6

Tokaboyao

(Luke 13:25-27)

21 Yaudi 'eguya si'awa'awa 'inapwana ta ma'etamo geya'abo silugulugu Yaubada 'ina 'ebeloina 'enaya, nate namo taudi Tamagu galewaya 'ana toematamatanao. 22 Tuta 'imeemai 'enaya tomota yaudi 'etamo 'eguya sida gwae, “'Inapwana, 'apaisewa manuyo ta 'amu esanega 'aloguloguguya ta yaluyaluwa bi'i tomota 'ediyega 'aula apwesedi, ta wate guinuwa 'ebe nuwaowanao 'aguinuwedi.”

23 'Enega 'ediya yada ona, “Nigeya yamwalamwalatonimi yaisigedi 'omi. Waila ta geya'abo waluguluguma, manuna 'omi toto'umalimi.”v21 Lu 6:46; Ye 1:22,25v23 2 Ti 2:19

Anuwa 'ana 'autui

(Luke 6:47-49)

24 'Igu ona getedi 'abo yaita 'inonodi be 'iematamatanedi tauna 'atuwa 'ebweu to'abi anuwa sinasinapuna, 'ina 'autui gulewa 'ena 'i'abina, 25 ga muliyega 'usana 'imwa'uta ga muluwa 'idau ta wate yagila sinabwana 'itowa ga 'ina anuwa nina nigeya 'ibe'ube'u, manuna 'ina 'autui gulewa 'ena 'i'abina.

26 Ta 'abo yaita 'igu ona getedi 'inonodiya ta geya'abo 'iematamatanedi, tauna 'atuwa to'abi anuwa uwauwana 'ina anuwa kaukau 'ena 'i'abina, 27 'enega 'usana sinabwana 'imwa'uta ga muluwa 'idau ta wate yagila sinabwana 'itowa ga anuwa nina 'iebuiyena ta 'ieligeya toilina.

28 Tuta nina e'ita getedi Yesu 'ilosalonidi ga boda nidi nuwadi 'iowana, 29 ta sigwae, “E'ita gete palupaluna ta waiwaina, ta 'ida loina 'ana toe'itao 'idi e'ita nenetana.”v28-29 Lu 4:32; Yo 7:46